طرد مغربي بعدما خسر 1000 يورو فالقمار و هرس الماكينات ديال اللعب
بجهة ريجو كالابريا ,تم توقيع الطرد لمهاجر مغربي فعمرو 34 سنة بحيث وضعتو الشرطة فمركز طرد المهاجرين حتى يكملوا الإجراءات القانونية باش اسيفطوه البلاد ,بسباب الفوضى اللي تسبب فيها و الخوف اللي داروا فنفوس السكان بعدما خسر فاللعب ديال القمار الف يورو ..
كيتواجد المغربي بشكل غير قانوني و كيبلغ فعمرو 34 سنة , بعدما خسر 1000 يورو فالآلات ديال القمار ناض وتهجم على مول المحل و قاليه رجع ليا فلوسي وبدا كيخرب ويهرس فالماكينات اللي كاينين فالمحل وبدا كيضرب يديه بالزاج ديال قرعة الشراب بعدما هرسها ؛ وبعد ما حضروا الكارابينييري ناض ولاح راسو فوسط البحر لان المحل كيطل على البحر فمنطقة سياحية , و بعد المجهودات اللي قامت بها الشرطة باش تقنعو يسلم راسو خذاواه للسبيطار باش يعالجوه وفذاك النهار سجلو الطرد ديالو …
كان هاد المغربي كيشتغل بائع متجول مع مغربي آخر و هاديك الفلوس اللي خسرها فالقمار كانت ديال شريكو فالخدمة بعدما كلفو يمشي يخلص باش يشريو بلاصة فواحد السوق موسمي فالمدينة و لكن الطماع الله يهديه ملي شاف الفلوس بغا يمشي يرباحهم بالساهل فالقمار ساعة ملي خسر كلشي اتصدم و كانت النهاية ديال الطماع ديالو أنهم اطردوه من ايطاليا وخصوصا ملي اكتشفو البوليس باللي عندو سوابق أي دوسيه موسخ…
sawtlmohajir.com
