جوج إيطاليين تعداو على مغربي بالضرب حتى قتلوه !!!

تعرض مهاجر مغربي البارح الاحد للضرب  بشكل وحشي من طرف جوج إيطاليين حتى اقتلوه , وقعت الجريمة فنواحي روما فإقليم “لاتينا” و السبب اللي اجعلهوم اضربوه أنهم شكو فيه كيخطط باش يسرق هو وواحد آخر كان معاه

وصرح القائد ديال الكارابينييري باللي السكان ديال منطقة “أبرليا” شكوا فالتصرفات ديال واحد السيارة كتدور فالمنطقة و اللي كان بالداخل ديالها جوج أشخاص السائق و المغربي اللي توفى , من بعد الشكوك ديال الساكنة أنهم كيخططوا باغين اسرقوا تبعاتهم سيارة واتصلت بالشرطة باش يتحققوا من الأمر ؛ حاولت السيارة المشكوك فأمرها باش تهرب حتى دارت حادثة , الشي اللي خلا السائق يهرب و بقى صاحبو اللي تلاحو عليه بالضرب فالأول كانوا كيضربو غير جوج ديال الناس من بعد كثروا ناس أخرين وتحاماو عليه كلهم وبكثرة الضرب توفى السيد فالبلاصة ..

وتمكنت الشرطة من التحقق من سبب الوفاة بعدما رجعات لكاميرات المراقبة واللي تبين فيها بشكل واضح جوج إيطاليين من سكان المنطقة كيتعداو على الضحية بالضرب , واللي تبين من خلال البصمات أنه مغربي فالعمر ديالو 43 سنة .

وجا التصريح ديال المتهمن بالنفي التام نالتهمة اللي توجهات ليهم , بحيث قالوا أنهم ما ضربوش الضحية غير تبعوه واتصلوا بالشرطة أما الوفاة ديالو جات بسباب الحادثة اللي تعرضت ليها السيارة , فالوقت اللي أكد فيه القائد ديال الشرطة أن الجثة كتبين أن الضحية تعرض للضرب فالجسد ديالو فحين ما يقدروش يحددو السباب ديال الوفاة حتى يخرج تقرير الطب الشرعي اللي غادي يوضح كلشي ,,

ودابا المتهمين فحالة سراح ولكن تحت المراقبة حتى تخرج نتيجة التقرير الطبي …

sawtlmohajir.com